2016-жылдын 24-февралында Кыргыз Республикасынын Кореядагы Атайын жана Толук ыйгарым укуктуу Элчиси А.Бешимов Корея Республикасынын Тышкы иштер министрлигинин Протокол департаментинин Башчысы Ли Джонг Иль мырзага ишеним грамоталарынын көчүрмөлөрүн тапшырып, расмий түрдө өзүнүн милдеттерине киришти.

Жолугушуу учурунда Кыргызстан менен Кореянын ортосундагы эки тараптык мамилелеринин абалы талкууланып, эки өлкөнүн ортосундагы соода-экономикалык кызматташтык жана маданият-гуманитардык байланыштарынын мындан ары да ийгиликтүү өнүгүшүнө ишенээрин билдиришти.

2016-жылдын 25-февралында Кыргыз Республикасынын Кореядагы Атайын жана Толук ыйгарым укуктуу Элчиси А.Бешимов Кыргыз-Корея достук жана  өз ара кызматташтык Ассоциясынын өкүлдөрү менен жолугушту. Жолугушуу учурунда кыргыз тарабына жалпы баасы 42,896 АКШ доллары турган “Ньюкатин” медициналык дары каражаты гуманитардык жардам катары тапшырылды. Берилген дары каражаты акыл иши функцияларынын бузулушу менен коштолгон оорулар жана улгайып калган адамдардын эске тутуу жөндөмдүүлүгүн калыбына келтирүү учун сунушталат. Гуманитардык жардам Кыргыз Республикасынын Саламаттык сактоо министрлигине жөнөтүлүп, аз камсыз болгон жана социалдык жактан корголбогон жарандарга таратылып берилет.

Кыргыз Республикасынын Корея Республикасындагы Атайын жана Толук ыйгарым укуктуу Элчиси А.Бешимов Сеул искусство борбору (Seoul Art Center/예술의 전당) уюштурган каллиграфиялык жазуу боюнча атайын иш-чарага катышты. Чет өлкөлүк Элчилердин “Бириг­үү” жана “Тынчтык” деген сөздөрдүн корей жана өздөрүнүн тилдериндеги каллиграфиялык жазуулары “Корея жарым аралынын биригүүсү” аттуу көргөзмөгө коюлат. Көргөзмө 2016-жылдын 1-мартынан 24-апрелине чейин Сеул искусство борборунун (예술의 전당) Сеул каллиграфиялык музейинде өтөт.

Келе жаткан жазгы Нооруз майрамыныздар менен чын дилимден куттуктап, сиздерге жарык маанай каалайм.

Эзелтеден бери Нооруз адамдын жан-дүйнөсүнө жаңыланууну, тазарууну, жаңы үмүт-тилектерди, жакшылыктарды алып келген. Нооруз майрамы элибиздин бейпил жашоого жана жаркын келечекке болгон үмүтүн арттырып, ар бирибизди эл-жерибизге, мекенибизге болгон сүйүүгө үндөп турат. Ушул жаз күнүндөй жаркыраган Нооруз майрамында чет өлкөлөрдө жашаган бардык мекендештерге тынчтык, бакыт-таалай, бакубат турмуш, жакшы ниеттерди каалайм.

Кыргызстан эгемендикке жеткенден бери көптөгөн кыйынчылыктарды башынан өткөрүп, далай тайгак кечүүлөрдөн өттү. Элибиз өткөөл кезеңдин бул сыноолорунан  абийир жана намыс менен чыгып, өлкөбүздө тынчтык менен туруктуулукту сактап кала алды. Бул ыйык майрам бизге ынтымакты, биримдикти, бүтүндүктү, тынчтык жана бейкутчулукту алып келишин жана Кыргызстан өз өнүгүүсүндө бийик жетишкендиктерге ээ болуусун каалайм.

Кыргыз Республикасынын Корея Республикасындагы Атайын жана Толук ыйгарым укуктуу Элчиси

Аскар Бешимов

Кореядагы Кыргызстандын Элчилигинин кызматкерлеринин Корея Республикасынын Тышкы иштер министрлиги, Юстиция министрлиги, Эмгек жана жумуштуулук министрлигинин өкүлдөрү менен болгон бир нече ирет жолугушууларынын жыйынтыгында, 2016-жылдын 29-мартында Кореянын Миграция кызматынын жетекчилиги тарабынан легалсыз мигранттар үчүн миграциялык амнистия жарыяланды. Легалсыз (уруксат болгон мөөнөттөн ашык) Кореянын территориясында жүргөн жарандар өз ыктыяры менен, депортациялоосуз жана мындан ары кирүүсүнө тыюусуз өлкөдөн чыгып кетүү мүмкүнчүлүгү түзүлдү.

Аталган акция 2016-жылдын 1-апрелинен баштап 2016-жылдын 30-сентябрына чейин 6 айлык мөөнөттө жүргүзүлөт. Ушул  мөөнөттө Кореянын территориясында легалсыз жүргөн Кыргызстандын жарандары өз ыктыяры менен мекенине чыгып кете алат. Бул учурда айып (штраф) санкциялары колдонулбайт жана Кореяга кийинки кирүүсүнө тыюу (депортация) салынбайт. Мындан тышкары, легалсыз мигранттар иштеген жумуш берүүчү ишканаларга айып (штраф) салынбайт.

Өз ыктыяры менен Кореядан чыгып кетип, Бишкектеги Кореянын Элчилигинен кезектеги визаны алуу менен, легалдык (мыйзам) түрдө,  ошону менен бирге EPS системасы (виза Е-9) менен, эч тоскоолсуз Кореяга кайра кире алат.

Кореядан өз ыктыяры менен чыгып кетүү үчүн Кыргыз Республикасынын жарандарына жогоруда көрсөтүлгөн мөөнөттө авиабилети жана жарактуу болгон паспорту, же болбосо Кыргыз Республикасына кайтуу жөнүндө күбөлүгү менен өлкөдөн чыгып кетүүгө эң жок дегенде 3 саат калганда  Инчхон эл аралык аэропортунундагы Миграция кызматынын өкүлчүлүгүнө келүүсү зарыл.

Өзгөчө белгилеп кетүүчү нерсе – үстүбүздөгү жылдын март айынан баштап легалсыз мигранттарды таап жана кармоо үчүн Кореянын Миграция кызматы, Эмгек министрлиги жана Улуттук полиция агенттигинин биргелешкен жана күчөтүлгөн рейддери жүрүп жатат. Легалсыз мигранттар кармалган учурда Кореядан токтоосуз депортацияланып, канча убакыт бою легалсыз жүргөндүгү менен көз карандысыз, 5 жыл мөөнөттөн ашык Кореяга кайра келүүгө тыюу салынат. Мындан тышкары, легалсыз мигранттардын жумуш берүүчүлөрү да жоопкерчиликке тартылып, административдик айып (штраф) же кылмыш жазасына (камакка алынуу) тартылат.

Кыргыз Республикасынын Корея Республикасындагы Элчилиги Кореянын территориясында легалсыз (уруксат берилген мөөнөттөн ашык) жүргөн Кыргызстандын жарандарын берилген ушул мүмкүнчүлүктү пайдаланып, өз каалоосу менен Кыргызстанга кайтууга чакырат.   Маалыматтарга ылайык, бүгүнкү күндө Корея Республикасында легалсыз жүргөн  Кыргыз Республикасынын жарандарынын саны 1200дөн ашат. Өз ыктыяры менен чыгып кетүү акциясы мындан кийинки Кореяда жүрүүсүн легализациялап, Корея Республикасында мыйзамдын негизинде эмгек ишмердүүлүгү менен алектенүүсүнө жакшы мүмкүндүк түзөт.

Толук маалымат алуу үчүн Кореянын Миграция кызматынын суроолор борборуна 1345 кыска номери аркылуу кайрылууга болот.

Инчхон аэропортундагы  Миграциялык офисинин телефону : 032-740-7391(2).

Ошондой эле, бардык суроолор боюнча Кореядагы Кыргызстандын Элчилигине төмөнкү номер менен кайрылсаңыздар болот: 02-379-0952.

Кыргыз Республикасы 2016-жылдын 2-апрелине караган түнүндөгү кан төгүүлөргө, адамдардын жабыр тартуусуна жана курмандыгына алып келген Тоолуу Карабахтагы курчуган кырдаал тууралуу маалыматты терең тынчсыздануу менен кабыл алды.

Кыргызстан эки тарапты тең жалпы кабыл алынган принциптердин жана эл аралык укуктук ченемдеринин негизинде тынчтык жолу менен чатакты жөнгө салуу жана курчутпоо үчүн тез арада сүйлөшүүгө отурууга чакырат.

Кыргыз Республикасы 1994-жылдын 5-майындагы Бишкек  протоколуна кол коюунун тарыхый тажрыйбасына таянып, талаш-тартыштарды чечүү үчүн конструктивдүү сунуштарды иштеп чыгууга чакырат жана саясий жактан көмөк көрсөтүүгө даяр экендигин билдирет.

Ар бир күнү Кореянын ар башка шаарларында Миграциялык кызматы, Эмгек Министирлиги жана Полиция агентствосу тарабынан легалсыз жүргөн жарандарды аныктап жана кармоо үчүн ыкчам аракет “рейд” жүрүүдө. Кармалган легалсыз жүргөн жарандарды, канча убакыт легалсыз жүргөндүгүнө карабастан, Корея өлкөсүнөн 5 жылдык мөөнөткө депортация кылынып кирүүгө тыйуу салынат.

Ушуга байланыштуу, эсиңиздерге саламын, урматтуу мекендештер, 2016-жылдын 1-апрелинен тарта 2016-жылдын  30-сентябрына чейин 6 айдын ичинде тоскоолсуз, депортациясыз жана штрафы жок Кыргызстанга чыгып кетсеңиз болот. Бул менен бирге сиздер тууралуу маалымат «кара тизме»ге кирбейт, кайра башынан корей визасын алганыңыздардан кийин, кайтадан Кореяга легалдуу келип окуп иштеп кетсеңиздер болот. Урматтуу мекендештер мүмкүнчүлүк менен пайдаланууга чакырам, мекенибизге барып, тууган уруктар менен көрүшүп, күч кубат алып кайра башынан мыйзамдуу жол менен Кореяга келүүңүздөргө тилектешмин.

Толук маалымат алуу үчүн Кореянын Миграциялык кызматынын маалымат борборуна алдыдагы уйулдук номери аркылуу кайрылсаңыздар болот: 1345

Инчхон аэропортунун Миграциялык офисинин телефону: 032-740-7391(2).

Жана башка суроолор боюнча Кыргыз Республикасынын Кореядагы Элчигине кайрылсаңыздар болот: 02-379-0952.

Урматтоо менен,

Кыргыз Республикасынын Элчигинин Консулу

Азиз Кыштобаев

Кыргыз Республикасынын Өкмөтүнүн токтомуна ылайык 3,4 май иш күндөрү 30-апрель жана 7-май күндөрүнө которулду. Ошондуктан дем алуу күндөрү  2016-жылдын  2-майдан тарта 5-майга чейин  жарыяланды.

Ушуга байланыштуу Элчиликке келүүңүздөрдү алдын ала пландаштырууңуздарды суранабыз.

2016-жылдын 3-майында Кыргыз Республикасынын Корея Республикасындагы Элчиси А.Бешимов жубайы менен Корея маданият борборлорунун ассоциациясы тарабынан уюштурулган Улуттук костюмдардын фестивалына катышты. Фестивалга 40 жакын дипломатиялык өкүлчүлүктөрдүн башчылары менен кызматкерлери катышып, өздөрүнүн улуттук кийимдерин көргөзүп жана атайын даярдалган корея улуттук костюму “ханбок” кийип салтанат менен өтүштү.

2016-жылдын 8-майында дипмиссиянын Башчысы А.Бешимов жана Кыргыз Республикасынын Корея Республикасындагы Элчилигинин кызматкерлери Улуу Ата-мекендик согуштагы Жеңиш күнүнө арналган салтанаттуу майрамга катышты. Маараке Россия Федерациясынын Корея Республикасындагы   Элчилигинин колдоосунда өтүп, майрамдын алкагында “Өлбөс полк” акциясы менен майрамдык концерт тартууланды.

Үстүбүздөгү жылдын 26-майында Ульсан эң ири өнөр-жай шаарында чет өлкөлүк жарандарга жумушка орношууга уруксаат берүү системасы (EPS) боюнча конференция болуп өтүп, Кыргыз Республикасынын Корея Республикасындагы Элчиси А.Бешимов катышты.  Конференция аталган программаны мындан аны өнүктүрүүнүн келечек пландарына байланышкан маселелерди талкуулоо үчүн Кореянын Эмгек ресурстарын өнүктүрүү кызматы (HRD Korea) тарабынан уюштурулду.

HRD Korea уюмунун Президенти  Пак Ёнг Бомдун куттуктоо сөзүнөн кийин жумушчу күчтөрүн жөнөтүүчү 16 өлкөнүн Элчилери  чыгып, EPSти мындан ары өнүктүрүүнүн мүмкүн жолдору жана перспективалары боюнча өздөрүнүн көз-караштары жана сунуштары менен бөлүштү.

Ошондой эле катышуучулар жумушка орноштуруу жана жумушчуларды башкаруу процессинин азыркы көрүнүшү жана көп  кезигишкен актуалдык проблемаларын талкуулашты. Элчилер тарабынан маалымат алмашуу каналдарын жакшыртып жана мыктылоо, Кореяда мыйзамсыз жүргөн эмгек мигранттарынын санын кыскартуу, жумушчулардын жаш чектерин 39 жаштан 45 жакша чейин көбөйтүү, мигранттардын эмгек ишкердүүүгүн жакшыртуу үчүн кошумча жагымдуу шарттарды түзүү сыяктуу суроолор боюнча ар кандай сунуштар тартууланды.

А.Бешимов HRD Korea кызматынын жетекчилигин көңүлүн кыргызстандык жумушчуларга эмгек контракттары аз келип жаткандыгына байланыштуу маселелерге бурду. Контракттардын көбөйүшүнө жана Кыргызстандан келген эмгек мигранттары иштей ала турган жумуш тармактарын кеңейтүүдө көмөк көргөзүүнү суранды.

Андан соң, катышуучу өлкөлөр мындай сыяктуу конференция жана семинарларды үзгүлтүксүз өткөрүү идеясын бир добуштан жакташты. Конференция алкагында катышуучулар үчүн бүт дүйнөгө белгилүү “Хьюндай” корей концернинин өндүрүштүк объектилери, кеме жана автомобиль куруу заводдоруна экскурсия уюштурулду.

• Кореяда эмгектенип жаткан кыргызстандык жумушчулар үчүн -

“Кесиптик деңгээлин мыктылоо” окуу тренингине катышуу

тууралуу маалымат

1. Долбоордун максаты

EPS системасы боюнча (чет өлкөлүк жарандарга ишке орношууга уруксаат берүү системасы) E-9 виза статусундагы Кореяда эмгектенип жаткан чет өлкөлүк жумушчулардын кесиптик ишмердүүлүгүн жакшыртуу жана иш шарттарына, жумушка көнүүсүн жогорулатуу

2. Окуу тренингине ким катыша алат?

ESP системасы боюнча Кореяга келип, ишканаларда эмгектенип жаткан чет өлкөлүк жумушчулар (виза E-9), 1500 адам

3. Тренингдин мөөнөтү

2016-жылдын апрель  ~ декабрь айлары  (төмөндө көрсөтүлгөн)

Окуу мөөнөтү: 48 саат, бир күндө 6-8 саат

Тренинг дем алыш күндөрү өткөрүлөт.

4.Тренингге керектүү чыгашалардын бөлүнүп берилиши

• Тамак-ашка керектүү чыгаша – катышуучулар үчүн (1 жолку тамакка 6,000 вон) төлөнүп берилет.
• Жол кире (1 жолкуга 2,500)

5. Катышуу жолдору: жогоруда көрсөтүлгөн окуу борборлору менен байланышып, сурап билип, катышууга билдирме берүү

Кыргызстанга кайтып кетүү мөөнөтү жакындаган жумушчулар үчүн

“Корей тили” окуу тренингине катышуу

тууралуу маалымат

1.Долбоордун максаты

EPS системасы боюнча E-9 виза статусунда Кореяда эмгектенип жаткан чет өлкөлүк жумушчулардын ичинен эмгек мөөнөтү аяктап, өз өлкөсүнө кайтып кетүүгө даярданып жаткан жумушчуларга корей тилин өздөштүрүүсүн жакшыртуу жана өз өлкөсүнө кайтып барган учурда жакшы орун алуусуна көмөктөшүү

2.Окуу тренингине ким катыша алат?

ESP системасы боюнча Кореяга келгенине 3 жылдан ашык өткөн  чет өлкөлүк жумушчулар (виза E-9) жана EPS системасы боюнча экинчи жолу Кореяга кайра келген чет өлкөлүк жумушчулар (виза E-9), 600 адам

3. Тренингдин мөөнөтү

2016-жылдын апрель ~ ноябрь айлары  (төмөндө көрсөтүлгөн)

Тренингдин максаты: Корей тили тестинин ТОPIK 3- деңгээли сертификатын алуу

• Бул окуу курсуна TOPIK 3 – деңгээлинен өйдө деңгээлге жетишкендер кабыл алынбайт.

Окуу мөөнөтү: 52 саат, бир күндө 3-4 саат

Тренинг дем алыш күндөрү өткөрүлөт.

4. Тренингге керектүү нерселердин берилиши

• Окуу материалы
• Жеңил тамак (간식)

5. Стимул

Бул окуу курсун аяктагандан кийин корей тили TOPIK 3 деңгээлинен тест бергендерге тестке катышуу үчүн керек болгон 24 доллар төлөмүнөн бошотулат жана жумушчулардын өлкөлөрүндөгү корей ишканаларына ишке кирүүгө көмөк көргөзүлөт.

6. Катышуу жолдору

Жогоруда көрсөтүлгөн окуу борборлору менен байланышып, сурап билип, катышууга билдирме берүү

Бул маараке Кыргыз Республикасынын Тарых жана маданият жылына арналып, Кореяга болгон сапар Кыргызстандагы “Евразия диалогу” коомдук уюму тарабынан уюштурулду. Бул уюмдун негиздөөчүлөрүнүн бири жана ардактуу Төрагасы Ч.Айтматов болгон.

Концерт Кореядагы кыргыз диаспораларынан активисттери, Кыргыз Республикасынын Корея Республикасындагы Элчилиги жана Сувон шаарынын Мэриясынын колдоосунда өттү.

Концерт Кыргызстандын Корея Республикасындагы Элчиси А.Бешимов жана Сувон шаарынын мэри Ём Тэ Ёнг мырзанын куттуктоо сөздөрү менен башталды. Азамат Болгонбаев көрүүчүлөрдү өзүнүн  төкмө акындык өнөрү менен кубандырып, Сыймык Бейшекеевдин аткаруусунда популярдуу кыргыз эстрада ырлары жаңырды.

Майрамдык концерттин алкагында “Евразия диалогу” коомдук уюму тарабынан тартылган өлкөдөгү тынчыкты, биримдикти сактоого жана этностор аралык мамилелерди бекемдөөгө чакырган социалдык видео-роликтер көрсөтүлдү.

Кореянын ар түрдүү шаарларында жашап жана эмгектенген кыргызстандыктар концерте катышып, ошондой эле корея коноктору кыргыз музыкасына жана концерттин шаңдуу атмосферасына күбө болушту.

Жарлыктын тексти толугу менен берилет:

2016-жылдын 27-августунда бир эле мезгилде эки каргашалуу окуя болду. Россия Федерациясынын Москва шаарындагы өрттүн кесепетинен Кыргыз Республикасынын 14 жараны каза болду. Бишкек-Ош автомобиль жолундагы кырсык 9 мекендешибиздин өмүрүн алды.

Кыргызстан эли үчүн бул орду толгус оор жоготуу болду. Кыргыз Республикасынын мамлекеттик органдары каза болгондордун үй-бүлөлөрүнө жана жабыр тарткандарга оор учурда колдоо көрсөтүү үчүн чараларды көрүүдө. Адамдардын курмандыгына алып келген себептерди объективдүү иликтөөнү камсыз кылуу иштери аткарылууда. Бул максатта Россия Федерациясынын тиешелүү мамлекеттик органдары менен да сүйлөшүүлөр жүрүп жатат.

Каза болгондордун туугандарына жана жакындарына терең кайгыруу менен көңүл айтып, токтом кылынат:

1. Кыргыз Республикасында 2016-жылдын 29-августу аза күтүү күнү деп жарыялансын.
2. Аза күтүү күнү Кыргыз Республикасынын бүткүл аймагында, ошондой эле чет өлкөдөгү дипломатиялык жана консулдук өкүлчүлүктөрдүн имараттарында Кыргыз Республикасынын мамлекеттик туулары түшүрүлсүн.
3. Кыргыз Республикасынын маданият мекемелерине жана телерадиокомпанияларына аза күтүү күнү оюн-зоок иш-чараларын жана берүүлөрүн токтотуу сунушталсын.
4. Кыргыз Республикасынын Өкмөтү жергиликтүү өз алдынча башкаруу органдары менен бирдикте каза болгондордун үй-бүлөлөрүнө жана жабыр тарткандарга керектүү жардамдарды берип, колдоо көрсөтсүн.
5. Бул Жарлык кол коюлган күндөн баштап күчүнө кирет.

2016-жылдын 28-августунда Кыргыз Республикасынын Корея Республикасындагы Элчилиги кыргыз диаспораларынын активисттеринин жардамы менен Ансан шаарында 2016 – Чет ѳлкѳлүк жумушчулардын достук фестивалына катышты. Фестиваль Корея адам ресурстарын ѳнүктүрүү кызматы (HRD Korea) тарабынан Кореядагы   чет ѳлкѳлүк жумушчуларды колдоо жана EPS (жумушка орношууга уруксат берүү системасы) системасынын мындан ары ѳнүгүүсү үчүн уюштурулду.

Эскертүү. Кыргызстан 2007-жылдан бери EPS системасынын мүчѳсү.

Өзүңүздѳр билгендей, 30-сентябрда «жашыл коридор» – Кореяда мыйзамсыз жүргѳн Кыргызстандын жарандарына эч тоскоолсуз, депортация жана айып тѳлѳѳсүз ѳз ѳлкѳсүнѳ кайтып кетүү мүмкүнчүлүгүнүн мѳѳнѳтү  аяктайт. Берилген мѳѳнѳттѳн пайдаланган учурда, эч кандай маалымат «кара тизмеге» кирбейт жана корей визасын алгандан кийин Кореяга кайра легалдуу түрдѳ келип, мыйзамдын негизинде эмгектенип же окууга болот.

Элчиликтин маалыматы боюнча, октябрь айынан баштап Кореянын ар кандай шаарларында Кореянын миграция кызматы, Эмгек министрлиги жана Полиция агенттиктери тарабынан легалсыз мигранттарды таап, кармоо үчүн күчѳтүлгѳн рейддер («камоо») жүргүзүлүп баштайт. Рейддер чет ѳлкѳлүктѳр жашаган аймактарда, заводдордо, фабрика жана фермаларда жүргүзүлѳт. Кармалган учурда сѳзсүз түрдѳ депортацияланып, Кореяда канча убакыт легалсыз жүргѳнүнѳ карабастан, кайра кирүүгѳ 5 жыл мѳѳнѳттѳ тыюу жана ошондой эле ири суммадагы айып салынат.

Буга байланыштуу, депортациясыз жана айып тѳлѳѳсүз Кыргызстанга кайтып кетүү мүмкүнчүлүгүнѳн пайдаланып, жакындарыңыздар, туугандарыңдар менен кѳрүшүп, эс алып, күчкѳ толуп, корей визасын алгандан кийин Кореяга кайра мыйзам түрүндѳ келүүңүздѳргѳ чакырабыз.

Толук маалымат алуу үчүн Кореянын Миграция кызматынын сурап-билүү борборуна 1345 кыска номери аркылуу кайрылсаңыздар болот.

Инчхон аэропортунун Миграция офисинин телефону: 032-740-7391(2).

Ошондой эле бардык суроолор менен Кыргызстандын Кореядагы Элчилигине 02-379-0952 номери аркылуу кайрылууңуздарды каалайм.

Урматтоо менен,

Кыргыз Республикасынын Элчилигинин Консулу А.Кыштобаев

Пресс-релиз

2016-жылдын 4-сентябрында Кыргыз Республикасынын Корея Республикасындагы Элчилигинде Кыргызстандын Кѳз карандысыздыгынын 25 жылдыгына жана Элчиликтин жаңы имаратынын ачылышына карата салтанаттуу азем болуп ѳттү.

Майрамдык аземге эмгек мигранттары, ишкерлер, студенттер жана Кореянын жарандарына турмушка чыккан аялдардан турган 50 гѳ жакын диаспоралардын лидерлери – кыргызстандык мекендештер катышты.

Элчи А.Бешимов мекендештерди Кыргызстандын тарыхында олуттуу жана маанилүү болгон Кыргыз Республикасынын Кѳз карандысыздыгынын күнү менен куттуктады. Өз кезегинде кыргызстандык диаспоралардын активисттери жаңы имаратка кѳчкѳндүгүнѳ байланыштуу Элчиликтин бүт жамаатын куттуктап, жылуу каалоо-тилектерин айтышты.

Салтанаттуу майрам биримдик, Мекенге жана Кыргызстандын маданиятына болгон сүйүү жана урматтоо атмосферасында ѳттү.

Кыргызстандын Корея Республикасындагы Элчилиги

Корея Республикасынын Иммиграция кызматынын маалыматы боюнча, Кореянын территориясында мыйзамсыз жүргөн иммигранттар үчүн үстүбүздөгү жылдын 1-апрелинен баштап киргизилген «жашыл коридор» үч айга, 2016-жылдын 31-декабрына чейин узартылды. Ошону менен бирге, миграция бийлиги бул режимди киргизүүнүн жакшы натыйжа бергендигин белгилешти: апрельден баштап августка чейин 28 миң адам бул режимди колдонгон, мурунку жылдын ушундай эле мөөнөтүндөгү (14 миң нелегал) көрсөткүчкө салыштырганда 2 эсе көбөйгөн.

Ошондой эле Иммиграция кызматынын баалоосу боюнча, үстүбүздөгү жылдын август айынын аягы менен эсептегенде, 211 миң чет өлкөлүктөр Кореяда мыйзамсыз эмгектенүүнү улантып жатышат, ал эми 2015-жылдын аягында легалсыз иммигранттардын саны 214 миң адам болуп эсептелген.

Интернет-булак: http://www.immigration.go.kr/HP/COM/bbs_003/ShowData.do?strNbodCd=noti0091&strWrtNo=859&strAnsNo=A&strRtnURL=IMM_3020&strOrgGbnCd=104000&strAllOrgYn=Y

Биз мурун билдиргендей, «жашыл коридор» режими менен колдонгон учурда Кореяда легалсыз эмгектенип жаткан Кыргызстандын жарандары эч тоскоолсуз, депортациясыз жана айып төлөөсүз өлкөдөн чыгып кете алышат. Ошону менен бирге, «кара тизмеге» киргизилбейт жана корея визасын алгандан кийин Кореяга кайра келип мыйзам негизинде эмгектенип же болбосо окуу мүмкүнчүлүгүнө ээ болушат.

Толук маалымат алуу үчүн Кореянын Иммиграция кызматынын кыска номерине чалсаңыздар болот: 1345

Инчхон аэропортундагы Иммиграция офисинин телефону: 032-740-7391(2).

Бардык суроолор менен Кыргыз Республикасынын Кореядагы Элчилигине төмөнкү номер менен кайрылсаңыздар болот: 02-379-0952.